Tihsimuyuntin wawakuna,
Ispaña urmayuhtinqa -chaytaqa niyllatan nini-
huh marq´ayllanpis hanahmanta urmayamuhtinqa
q´aspachunku iskay waskhapi allpa q´aspanata;
wawakuna, t´uqu ñawikunaqa may watayuhñan.
Waynallarahmi Intipas qankunawan rimahtiyqa.
Ichaqa usqhaytan khunununun,
qhasquykichispiqa, machu kayqa.
May machuñan kuwadirnuykichispiqa
dus calificacionqa.

Thihsimuyuntin wawakuna, sasatan qhatapi
wixsanta tanqashan mamanchis Ispañaqa;
kay mamanchisqa hasut´iyuhmi kashan;
mamatah, mayistratah,
Crustah, kurkutah, llapata hatarichiwasqanchis rayku;
manchay uma kuyuchihtah, rakihtah, yapahtahmi, wawakuna;
paypin chaykunaqa kashan, chaninchah taytakuna.

Urmayuhtinqa, -chaytaqa niyllatan nini- Ispaña
urmayuhtinqa, kay pachamanta uxuman urmayuhtinqa,
wawakuna, manan wiñankichisñachu.
Imaynatarahchá q´asuyukunqa wata killatapis.
Chunkallapin kirupis tatipunqa,
t´urpusqatah diptongopis, medallapis waqapunqan.
Chitachapis tintiruman watasqan rixurinqa.
Imaynatatah lluskhankichis alfabetoh pata patantari
llaki pachah abisichinta tarinaykichis kamari.

Wawakuna,
awqatinkuh churiyasqankuna, kunanqa,
susiyllawan rimaychis, Ispañan kunan kutipuni
rakiripushan kallpata uywakunaman,
ñut´u t´ikakunaman, chinchayman,
runakunaman ima. Upallayuychis, ancha
phiñasqan kashan, pusq´u phiñakuywan,
ancha hayrataypi mana ima ruwayta axllarispa, makinpitahmi
kashan huh uma putu rima rimarih, simi sapa,
ñawpah chuxcha sinp´ayuh putu,
munay kawsayniyuh uma putu.

Upallaykuychis, mink´aykichismi;
thasnuykuychisyá takisqaykichista, hik´ispa
waqasqaykichista, kinsa k´uchu tiyanah llakinta, iskay
rumiwan k´irinchasqa umah mat´intapis.
Samaynikiychista pisiyachiychis,
ñawpah marq´an urmayuhtinqa,
chaki tullunkuna k´irkiryahtinqa, tuta kahtinqa,
hanah pachata iskayman kay pachapi p´akirusunman chayqa,
punkukuna qaparikuhtinqa, qhipakuhtiyqa,
mana pita rikuhtiykichis manchachisunkichis chayqa,
k´uhmu lapiskunawan, mamanchis
Ispaña urmayuhtinqa -chaytaqa niyllatan nini-
lluhsimunkichismi tihsimuyuntin wawakuna;
paymantan sayarinkichis...