Vallejomanta tukuy ima yachah masinkunamantawan

César Vallejoqa sinchi waynallarahmi wayqichanakuran hatun runakunawan político, llinp'ihkunawan ima. Payqa Bachillermi rixurin Truxillu Ubersidadpi l9l5 watapi. Rihsinakusqayá Víctor Raúl Haya de la Torrewan, José Eulogio Garridowan, Alcídes Spelucinwan, Macedonio La Torrewan ima. Paykunan "Norte" nisqa aylluta kamarisqaku Antenor Orregoh umallisqan. Hahiy watakunapiyá, llahta runakunah musuhyayninwan chhaphchirisqa, aswantaqa wayllawisakunah umallisqan, askha allpayuhkunah pisiyahninpi, kumunistakunah, psicoalisis nisqah philosophiyanwan ima kallpachasqa, harawinkunata rihsichiyta qallarin ⁽²⁾.

Limaman chayamuspaqa wayqichanakunmi Manuel Gonzales Pradawan, Abraham Valdelomarpuwan hinaspatahmi haykupun "Colónida" nisqa aylluman. Chay uxupiyá qallarin rihsiyta musuh Iwrupa suyupi rixurisqanta. Gonzales Prada wañupuhtinmi sinchitapuni llakiyukun, chaymi qilqan "Los dados eternos" nisqa harawita, khaynata qallarispa: Manuel Gonzales Pradapah ancha salqa,axllasqa ima wayllukuywan chay hamawt'a runapah, tukuy ima hatun maskhahpah.

Vallejoqa sinchitayá uxyarun kumunistakunah ununmanta hinaspatahmi rixurirapun sinchi t'aqasqa chay kamachihkunah uxunpi, chaywantahmi riki karunchakun llahtah yuyaymanayninmanta, imaynan nin hamawt'a Mariátegui hina. " Colonidaqa" huh pisi purinan ñanllan rixuripun chaymi huh ñankunata puririyta qallarin, machay llakisqa Gonzales Pradah wañusqan rayku, pay kikinpas ancha llakih ñit'iykusqan ⁽³⁾.

(2) "Diccionario Histórico y Biográfico del Perú" qilqapi siq'isqa."

(3) Ríos Burga, Jaime l994. "El Tiempo de Vallejo: Sociedad, Identidad y Cultura. En Coloquio Internacional "Vallejo, su Tiempo y su Obra" (Lima, l992), Actas. Universidad de Lima (Separata).