Mamacha Kandilariya Raymi

Manchay Hatun Raymin

Qullana P'unchay, mamacha unanchaña

Uxtawanpi Hatun Rayminchakuy

Yuyarina

 

 

 

Manchay Hatun Raymin

Mamacha Kandilariyah rayminqa sapa 24 p'unchay iniru killapin qallarin l8 p'unchay fibriru killapitahmi tukukapun.Chay p'unchaytahmi riki qallarin carnabal q'uchurikuy. Chay p'unchaykunapiyá huñunayukunku qanchis chunka "banda de musicos" nisqakuna.

Wakinqa yaqa kinsa pachax runayuhmi rixurinku tusuhninkunapuwan.

Chay bandakunaqa manayá sapa p'unchaychu tukayunku. Suyankun ima p'unchaychá, ima urastachá huhpa rantinta rixurinqaku chayta. Chaywanyá riki mamachaqa mana ima p'unchaypis, mana ima uraspi mana banda de musicosniyuhqa rixurinqachu tukuy rayminpi. Hinallatahmi tusuhkunapis suyayunkun ima urastan mamachata kusichinqaku tukuy imaymana ruwasqamkuwan chayta.

Qallariy p'unchaykunapiqa tusuhkunaqa tusuyunku aswan allin rixurinankupah corzo nisqapi, chaypi ancha yallipah rixurinankupah "Concurso de Danzas Folklóricas" nisqa chayamuhtin. Sapanka k'ixllupin, sapanka wasinpin huh hina, huh hina tusuypas, takiypas uyariyukun sapa p'unchay, sapa tuta. Wakinqa uxyayunkuyá sirwisatapis, ima trawtapis, hinaspa macharunku ima.

Fibriru killa chayamuhtinmi, las tris uras paqariypi, Alferado-Organizadorqa Asuguini urquta wichaykun bandakunawan, wakin munasqan runakunawan ima hinaspanmi qaparimun chay patamanta pacha khaynata: Mamacha Kandilariyah Rayminmi chayamun nispa. Chaypachaqa lluymi qunqur chaki churakunku mañakuyninkuta mamachaman haywarispa, kuyti, kamarita nisqakunata t'uhyaykachispa. Chaymantaqa trawtayá rakirinku lluymanpis. Punu llahtatahmi ancha kusikuypi lluhsimun raymita thaskirichispa hinantin suyukunaman.

 

Lluyni puririnku mamachah phistanmanqa
imaymana p'achawan p'achalliyukuspa.

       
     
    Pacha paqarihmuhtinqa, "Pandilla" nisqa sutiyasqaqa urayamuytayá qallariramun chay urqu patamanta tususpa. San Huwan Bawtista inlisamanmi, chaypin kashan Mamachaqa riki, chayarun hinaspanmi qallarin misaqa Intih wach'iynin Titi Qaqah unun patanta lluskharimuntin.

Tayrichantaqa, Alferadowan, warminpuwan, Alferada nisqawan, puririyta qallarinku wasinkumanta San Huwan Inlisaman askha siriyu astah warmikunawan. Hisus wawachatan marq'ayukunku bilakunawan,siriyukunawan ima k'anchayukuspanku.

Bispiras p'unchaytaqa kanyá hatun misa hinaspanmi chaypiqa tusuhkunawan, kuyti t'uhyaykachiwan silutarah k'ancharparinkupas chaymi sumah sumahta lliphiphipichin Titi Quchah asul asul ununtapis. Chaypimá q'apirukunapis tukuy kallpakuwan takirichinku chay banda de música nisqa phukunakunatapis. Chaypiqa uxanaqa hich'a hich'arinapahrah kashanpis. Chaypin kashan punchi nisqanku, anisadupas, sirwisapis kikin insilah punkunpi, laqha tuta chayamunankama.